亞冠盃E組賽事，有葡萄牙巨星Ｃ朗拿度掛帥嘅艾納斯，將會作客柏斯波利斯。沙特球會近年壟斷西亞區，夏天瘋狂擴軍後實力更加超班，艾納斯被視為冠軍熱門之一，首戰硬撼伊朗勁敵會全力爭勝，客勝可作過關變倍器。（HOY TV 76台周三凌晨2時直播）

Ｃ朗態勇頻頻士哥
柏斯波利斯上屆因被取消資格而缺席亞冠，闊別1年後再戰，當然希望再創佳績，佢哋前屆8強就係被沙特球會希拉爾淘汰；2020年佢哋殺入決賽，4強對手就係艾納斯，當時柏斯波利斯靠互射12碼晉級，但今時唔同往日，艾納斯實力已幾何級數提升。

艾納斯依家陣容鼎盛堪稱亞洲之冠，Ｃ朗拿度、沙迪奧文尼、波索域、拿樸迪等，全部都係歐聯冠軍級球星，相信只有其他沙特球會能夠抗衡，而且艾納斯近5仗亞冠盃拎到4勝，Ｃ朗對上4仗攻入7球狀態巔峰，今仗有力再下一城，客勝係過關膽之選。