利矛遇鋼盾前鋒捱細界
2021/04/07文:工廠仔
周三日職快車，班霸川崎前鋒主場迎戰韌力十足嘅鳥棲砂岩，呢場亦係最強進攻對最強防守嘅矛盾大戰。川崎前鋒開季7勝1和不敗高踞榜首，不過上場被破不敗身嘅鳥棲砂岩亦唔係不堪一擊，上仗作客勁旅大阪櫻花僅輸0比1，係今季聯賽唯一失球，防守力強，前鋒要贏波恐怕要出盡九牛二虎之力，2.5球嘅入球細抵玩。（周三晚6時開賽）

川崎前鋒喺日職實力大超班，不過聯賽始終係長途持久戰，經驗豐富嘅前鋒亦深明唔可能每場比賽都鋒芒畢露，近期賽事搶攻力度稍為回落，近5場聯賽有4場入波少過3球，呢4仗總入球都係2球或以下。川崎前鋒上仗主場迎戰弱旅大分三神，輕描淡寫贏2比0就收夠籌，面對鳥棲砂岩，相信亦只望贏波而唔會追求大勝。

鳥棲7戰僅失1球
鳥棲開季6場聯賽均保持不失球，直到上場先以1球僅負，防守組織嚴密，失球數字低絕非僥倖。作客上季王者川崎前鋒，鳥棲將會屯重兵死守力求搶分，前鋒要撕破客隊防線將遇上嚴重阻力，鳥棲今季7場聯賽6次總入球為2球或以下，2.5球嘅入球細要追。