韋斯咸執到寶唔赦熱刺
今晚英超早場上演「倫敦打吡」，韋斯咸主場鬥熱刺，「錘仔幫」韋斯咸可以話係今季「神奇球隊」，雖然陣中冇乜球星，但勝在實而不華，佢哋近8場聯賽贏咗6仗。反觀由名帥摩連奴領軍嘅熱刺，即使有兩位星級射手哈利卡尼、孫興民助陣，但成績令人失望，近5場聯賽更加輸咗4仗，梗係捧當頭起嘅韋斯咸主勝。
（Now 621周日晚8時直播）
連格加盟錘仔生晒
今場屬於兩位前曼聯領隊嘅對決，以近況嚟睇，當然係韋斯咸主帥莫耶斯表現明顯勝一籌，佢帶領人腳質素平庸嘅韋斯咸，成為有力爭入前4位嘅球隊，實在難能可貴。同時莫耶斯簽人亦獨具慧眼，早前向曼聯借用連格，呢位被「紅魔鬼」投閒置散嘅中場，首次為韋斯咸上陣對維拉，就射入兩球，上場對錫菲聯亦博到12碼，表現極具威脅，以「錘仔幫」近5場主場4勝嘅走勢，今場勝算甚高。
熱刺自從上年12月中不敵利物浦之後，表現急轉直下，近5場聯賽除不敵勁旅車路士、曼城之外，甚至輸畀護級球隊白禮頓，可見熱刺整體狀態低迷。再者，佢哋剛於周中飛赴匈牙利出戰歐霸盃32強賽事，球員經過舟車勞頓，今場又要作客，體力難免不及以逸待勞嘅韋斯咸，捧主勝為佳。
|
