拉素帕心口闖關讓主抵玩
 意大利盃上演最後1場16強賽事，拉素主場迎戰帕爾馬。拉素過去4屆有2屆打入決賽，睇得出非常重視呢項錦標。反觀帕爾馬喺聯賽深受降班威脅，無力兼顧盃賽，近6場又僅得1和5負，當中4仗輸2球或以上，可直取拉素讓球主勝。

（周五凌晨4時15分開賽）

拉素喺季初一度表現走下坡，但球隊人腳質素佳，經過一輪調整後已經全面回勇，近期取得3連勝，包括上場意甲「首都打吡」以3比0大勝羅馬，大大提升球隊士氣及信心。雖然「藍鷹」首要目標係打入聯賽前4位，但亦唔會放棄盃賽，佢哋一向好重視意大利盃，過去4屆有2屆闖入決賽，並喺2019年奪得冠軍，相信今場會強陣出擊爭勝。

帕爾馬近況曳爆
雖然拉素中場主將路爾斯阿拔圖入院割盲腸，將會缺席今場比賽，但佢哋仲有射手恩莫比尼、卡些度、米連高域沙域等進攻好手在陣，足以攻陷帕爾馬防線。

帕爾馬現排聯賽榜尾2，降班危機愈來愈大，只能集中力量踢護級戰，爭盃賽對佢哋嚟講實在太「奢侈」。事實上，就算帕爾馬想贏亦有心無力，皆因球隊狀態同實力都不足，近6場比賽僅獲1和5負，包括聯賽主場0比2不敵拉素，今場作客情況更悲觀，隨時大敗收場。