祖記讓主十拿九穩
 大勇爭盃有心有力
意大利盃上演16強賽事，祖雲達斯主場迎戰熱拿亞，祖記上場聯賽贏波，但有2位主將受傷，預料教練派路會輪換陣容，幸好球隊人腳充裕，副選質素有保證。反觀熱拿亞喺聯賽深受降班威脅，無力兼顧盃賽，預料祖記可以大炒對手，讓球主勝讓2球照捧。

（周四凌晨3時45分開賽）

祖記狀態大勇，3連勝共入10球，包括贏意甲榜首AC米蘭，上場以3比1擊敗薩斯索羅，前鋒保羅戴巴拿、韋斯頓麥堅尼受傷退下火線，預料今場無法披甲。不過，陣中仍有高質副選可用，上場後備上陣嘅艾華路莫拉達、艾朗藍斯今場可望擔正，其中艾朗藍斯上仗更加射入1球。貝拿迪斯治、拉比奧特都要爭取表現，如果佢哋有得上陣，一定搏命。「斑馬兵團」一向重視意大利盃，近6屆有5屆打入決賽，其中4屆捧盃，今場應會全力爭勝。

熱拿亞專注護級無謂搏
熱拿亞現時排意甲尾4，已經捲入降班漩渦，球隊今季最大目標係保住意甲席位，盃賽只屬次要，喺人腳有限情況下，熱拿亞需要作出取捨，專注踢好聯賽係好合理嘅選擇，更何況熱拿亞近3次對祖記都輸波，實力明顯有距離，今場作客形勢更惡劣，祖記讓球主勝捧得過。